Exo 31 | NdeIBE | STEP | Jehova wakhuluma njalo kuMosi wathi,

Exodus 31

Ukukhethwa kukaBhezaleli lo-Oholiyabhi.

1 Jehova wakhuluma njalo kuMosi wathi,

2 “Khangela, sengikhethe uBhezaleli indodana ka-Uri oyindodana kaHuri owesizwe sikaJuda 3 ngamgcwalisa ngomoya kaNkulunkulu, lobuciko, ukuhlakanipha lolwazi lwenhlobo zonke zemisebenzi 4 ukuze aqambe imisebenzi yobungcitshi yezinto ezenziwa ngegolide, ngesiliva lethusi, 5 abaze amatshe awabeke kuhle, abaze lezigodo kanye lokwenza yonke imisebenzi yobungcwethi. 6 Ngikhethe lo-Oholiyabhi indodana ka-Ahisamaki, owesizwe sikaDani ukuba amncedise. Njalo izingcitshi zonke ngizinike ubuciko ukuba zenze konke engikulaye ukuba kwenziwe: 7 iThente lokuHlanganela, ibhokisi Lobufakazi, isihlalo somusa esikulo, lakho konke okunye okokuhlobisa ithente – 8 itafula lezitsha zalo, uluthi lwesibane lwegolide elihle lezitsha zalo zonke, i-alithare lempepha, 9 i-alithare lomnikelo wokutshiswa kanye lezitsha zalo zonke, umganu wokugezela kanye lezinyawo zawo

10 lezambatho ezelukiweyo, lezambatho ezingcwele zika-Aroni umphristi kanye lezambatho zamadodana akhe ezomsebenzi wabo wobuphristi, 11 lamafutha okugcobela isikhundla, lempepha enuka mnandi eyeNdawo eNgcwele. Kumele bakwenze njengoba ngikulayile.”

ISabatha

12 UJehova wasesithi kuMosi, 13 “Batshele abako-Israyeli uthi, ‘Kumele ligcine amaSabatha ami. Lokhu kuzakuba yisibonakaliso phakathi kwami lani kuzizukulwane zenu ezizayo, ukuze lazi ukuthi mina nginguJehova olenza libe ngcwele.

14 “ ‘Gcinani iSabatha ngokuba lingcwele kini. Lowo olonakalisayo kumele abulawe, lalowo osebenzayo ngalolosuku uzasuswa ebantwini bakibo. 15 Umsebenzi kawenziwe okwezinsuku eziyisithupha, kodwa usuku lwesikhombisa luliSabatha lokuphumula, lungcwele kuJehova. Lowo osebenzayo ngosuku lweSabatha kumele abulawe. 16 Abako-Israyeli kumele bagcine iSabatha, baligcine kuzizukulwane zabo ezizayo njengesivumelwano esingapheliyo. 17 Lizakuba yisibonakaliso phakathi kwami labako-Israyeli nini lanini. Ngoba ngezinsuku eziyisithupha uJehova wenza izulu lomhlaba, kwathi ngosuku lwesikhombisa wazila umsebenzi waphumula.’ ”

18 Kwathi lapho uJehova eseqedile ukukhuluma loMosi entabeni yaseSinayi wamnika izicecedu ezimbili zamatshe obuFakazi, izicecedu zamatshe alotshwe ngomunwe kaNkulunkulu.